LA VISTGA

LAS CUMPONENTAS

Las vistgas disponan d'ina pluna differentas cumponentas mineralas ed organicas. Da spezial interess farmacologic èn duas substanzas tipicas da la vistga: ils viscotoxins ed ils lectins da vistga.

Perquai che la vistga è colliada cun la circulaziun d'aua da la planta ospitanta, surpiglia ella ils minerals schliads lien che mintga spezia da plantas absorbescha dal terren mintgamai en proporziuns specificas.

Cunzunt la primavaira passan da la planta en la vistga era substanzas organicas che ascendan ensemen cun il suc. Latiers tutgan acids aminus, zutgers cun in pitschen pais molecular e substanzas vegetalas secundaras ch'èn ultra da las substanzas mineralas la basa per la specificadad transferida da la planta ospitanta.

Ils viscotoxins ed ils lectins da vistga èn percunter substanzas da protein che la vistga furma sezza. Lur concentraziun variescha tut tenor la sutspezia da la vistga e tut tenor la planta ospitanta, sin la quala ella crescha. Ils viscotoxins cuntanschan la pli auta concentraziun la stad en ils fegls giuvens, ils lectins da vistga èn percunter il pli concentrads l'enviern ed en ils costs pli vegls.