LA VISTGA

LA VISTGA E SES ANIMALS

La vistga ha differentas relaziuns cun il mund dals animals: utschels procuran per sia derasaziun, insects per l'impollinaziun e differents adversaris per la regulaziun da l'effectiv da vistgas.

Embrios da vistga n'èn betg buns da sa deliberar or dal fritg. Per pudair sa derasar è la vistga dependenta da tscherts utschels che sa nutreschan durant la stagiun fraida da sias coclas e che delibereschan il sem tatgus or dal fritg. Il tursch perniclà e la fustgetta dal chapitsch èn ils acturs ils pli impurtants en connex cun la derasaziun, però er ils frisuns giogan ina rolla.

La vistga è bichasana. Las flurs da vistga masculinas e femininas sa sviluppan sin differentas chaglias da vistga. Damai ch'il vent na po betg purtar il pollen da vistga masculin sin il stigma da las flurs femininas, èn insects activs era l'enviern responsabels per l'impollinaziun da la vistga.

Adversaris natirals limiteschan la derasaziun da la vistga. Ils masets piclan l'enviern ils sems ed ils embrios da la vistga. La primavaira maglian las lindornas e glimajas ils embrios da vistga schermigliants, però era giuvens romins da vistga. Intginas vistgas van schizunt a finir en ils maguns da mieurs e chavriels.